إلى أمي كلمات الدكتور خليفة الخطيب جريدة أخبار البحيرة

إلى أمى
_________________________________

لما بفتكرك يا امى
بفتكر أيام لذيذة غايبة عنى
بفتكر وانتى صبية
ماسكة حيلك وعفية

لما بتعب بتشيلينى
فوق كتافك يا رضية
لما ببكى تسكتينى
لما بجرى تسنيدينى
خوف عليه

خايفة م الريح إللى طاير فوق كتافى
تسنيدينى تسعدينى بالعوافى
خايفة م الشمس القوية

شايفه نومى قبل نومك
شايفه كل الدنيا ليا
راحتى تبقى هى راحتك
فى طفولتى فى شبابى
كل أيامى اللى جاية

امى انت كام بسيطة
بحر زاخر فى محيطة
كل أيامك سخية
تتعبى وتريحينى
دى طبيعتك ياهدية

دى طبيعتك ياملاكى
حكمة الذات العلية
ربنا يطول فى عمرك تسعدينى
صبر عمر وروح قوية

امى سيرتك فى حياتى
امى بكرا وذكرياتى
انتى فرحى وآهاتى
انتى ايوب اللى صابر
انتى نسمة صيف وعابر
انتى شخصية مكابر
فى عنادك ريح عتية

انتى ربوة فى فلاة
ترتوى بفضل الإله
نبتة فيح ذكية

امى كم أنتى صبورة ؟
امى كم أنتى وقورة ؟
رغم الأيام العصية

ربى يجزيك محبة
ربى يغنيكى بأحبة
فى رحاب خير البرية
فى جوار نبينا طه
ف جنة الخلد العلية

بعد عمر طويل وفرحة
بعد عمل عظيم مكافحة
يالعظيمة يا الأبية
،،،،،،،،،،،
:

خلاصة التجربة
___________

ربى عوضنا بفضلك
فى زمن فيه الكتير

اللى يخدع أو يمالق
ربما يصبح وزير

يرتقى أعلى المناصب
للرئاسة من غفير (خفير )

كان بيحرس فى البرارى
منصبه يصبح خطير

كل مايملك لسانه
بيه يرطب بيه يدير

تستحى منه البجاحة
لما يقبل تستدير
،،،،،،،،،،،
هى دى خلاصة حياتنا
ولا تنكر يامدير ؟
،،،،،،،،،،
كن منافق تستريح
تبقى من الناس الكبار

تبقى فى قمة مرادك
يبقى بيتك كل دار

تبقى من كاتب مكحكح
لسعادة المستشار

تبقى لك حظوة وهيبة
تبقى حاوى لك مزار

تبقى عضو البرلمان
ولا أكتر لك وقار

كلها بنشين وجزمة
ويا واحد كالحمار

ينعتك ياباش مهندس
يسمعه خلف الستار

كل متشوق لمنصب
كل تايه فى المرار

غرقك فى بوس أيادى
تبقى فكيت الحصار

فى المحافل هى كلمة
حلوها ساعة نهار

يتخدع فيك الغلابه
يدفعوا لك بالدولار

يطلبوا منك مصالح
يبقى ترس الظلم دار

كم تجاوز فى المجامع
يفسدك تصبح قطار
،،،،،،،
تنسي أصلك يا مواطن
تبقى راجل مستنير

تفتى فى الإبرة الصغيرة
تبلع المنجل ؛ خطير !!!

تحسد الشارب بكفه
وانت تملك ألف بير (بئر)
،،،،،،،،،،،،،
هى دى كل الحكاية
قلى رأيك يامدير .
،،،،،،،،،،،،،،،،،،،